“Ou Kraalliedjies”

Harald Richter en Lieb Bester, wat pa Fritz en sy seun, Charl in die gewilde KykNet-sepie, Villa Rosa speel, het musikale kragte saamgespan met die opname van “Ou Kraalliedjies”.

Tog nie nóg akteurs wat wil musiek maak nie!

Maar wag:nie een van hulle is groentjies as dit musiekmaak kom nie. Lieb speel reeds jare lank klavier, akkordion, konsertina en kitaar, en is deel van ‘n suksesvolle orkes. Hy het reeds ‘n paar Boeremusiek CD's agter sy naam.

Harald het sy loopbaan begin as operasanger, na 4 jaar se studie by die Technikon Pretoria operaskool. Sy debuut in die opera, Martha, by die Roodepoort Stadsteater was reeds op 21-jarige ouderdom, waarna hy met ikone soos Marita Napier, Sibongile Khumalo en Elaine Paige gewerk het.

“Ou Kraalliedjies” is ‘n vernuwing van liedjies gesing deur Charles Jacobie, met vars verwerkings van dié nostalgiese, amper vergete melodieë – musiek wat die ouer garde die diepste heimweë gee en die jonges laat saamdans!

Bekende titels sluit “Boereseun”, Liefling van die Vrystaat”, Huisie in die Berge” en “Boereplaas” in. Hier is ‘n CD wat die volk verseker weer laat skoffel!

Vergeet van die “African” Renaissance – hier kom die Afrikaanse Renaissance!!!